L'annu 1943 in Conca

Duranti l'uparazioni di libarazioni di a Corsica, chì ani duratu da u 9 sittembri à u 4 uttrovi 1943, a noscia cumuna hé stata colpa bè da a verra.

A 90esima Panzer Division s'appronta à passà da a Sardegna à a Corsica par chì l'alliati sò par iscalà in Italia. Litocca à andà in Bastia par pedè ghjunghja in Italia di u Nordu.

In Italia u duce era statu cacciatu da u puteri in a fini di luddu di u 1943. L'ottu sittembri a distituzioni hè ufficiali è i risistenti s'approntani. U novi sittembri, u Fronti Nazionali (urganizazioni di risistenza in manu à i cumunisti) faci sparà a rivolta ginirali.

In a noscia cumuna, com'é in tutta l'isula, i patriotti ani presu l'armi. A sera di l'11 di sittembri s'impostani i risistenti in Fautéa in u stradonu. Di punta à i blindati li tocca à vultà in Conca.

U 19 sittembri, l'Alimani venini dui volti à circà risistenti o armi in Conca. Soca pensani ch'eddi si piattani in paesu.

Mentri chì l'avanguardia di u "premier Battaillon de choc" era scalatu in Aiacciu libaratu u 13 sittembri, uni pochi di soldati di stu battaglionu ghjunghjini in Conca u 20. Una quindicina d'omini cumandati da u spiranti Jean Pierre Michelin, cù u tinenti Jacobsen di u statu maghjori di u battaglionu, sò accolti da a pupulazioni. Pensani d'andà à impustassi quandu l'Alimani facini saltà u ponti Purciledda mezu da Santa Lucia à Conca. A imbuscata accadi a sera stessa. Vintunu patriottu s'impostani mezu da a vadina di Conca à a bocca di Fautea. A 6 ori una culonna di 12 camiò alimani hè accolta da i granadi è i FM di i patriotti.

L'alimani si cacciani à fugja. 5 camiò sò distrutti è 20 alimani sò tombi.

I patriotti vani in Conca.

U 21 sittembri dopu meziornu una patrtruglia alimana di 5 o 6 omini hè ubligata à vultà in daretu par via di fucilati di i patriotti (a mezu ad eddi c'era Charles Lanfranchi è unu di frateddi Nicoli).

Di puntu à u rìsicu d'assaltu alimanu, un pianu di difesa hè missu in piazza :

i "chocs" cullucati un pocu nanzi à a ghjesia è aprudendu u campanili com'é vataghju difendini l'intrata di u paesu pà u stradonu, intantu u gruppu di Jeannot Mosconi assicureghja a securità versu a Bocca di Sàdica sopra u paesu. In più una posta hè missa in piazza à a cansa di a Punta Calcina.

Eppuri, in a nuttata di u 21 à u 22 sittembir, un distaccamentu alimanu riesci à passà senza fassi veda. 80 omini cù mitragliosi è cannoni s'impostani in i tozzi di l'intrata suttana di u paesu. Mossi in ricunniscenza, u spirani Michelin è a so vida Ghjuvan Battisti Leccia chì cridiani d'essa prutetti da u "vatatoghju" sò tombi.

Un sarani micca morti in darru.

Avà i "chocs" cunnoscini u pirìculu è l'alimani sò suspresi di scuntrà un officiali di l'armata rigulari è dunqua ùn sani micca chì hè a putenza di focu di l'omini agguattati in Conca. U tinenti Jacobsen e Roger Ballès tirani à l'alimani da u campanili. Quiddi rispondini cù un tiru di "mortier" pocu pricisu, a campa, com'è i cannunati chì ghjunghjini da u fiuminali. In su mentri Paul Olivesi è u so gruppu facini l'avvinta di l'amimani. Paul Cavalloni tira di FM, aiutatu Sauveur Camadini, Paul Mathieu Leccia, Raymond Mamelli è Jean Baptiste Susini.

I tiri alimani sò sempri più impurtanti è Paul Cavalloni è tombu. I patriotti è i "chocs" voltani in daretu. Dopu l'alimani pugnani d'avvicinassi un' altra volta è sò parati dinò. Inveci chì a situazioni paria di cuntinuà cusì, l'alimani si ni vani purtendusi cun eddi morti è è ferti. Per fughja i bombi i Cunchesi sò andati à piattassi in si machji di u Radicali o ancu in Cappeddu. Ma 4 cunchesi sò stati ferti listessi : Marie Françoise Leccia, Jéromine Leccia (a moglia di Jean Baptiste), François Mannarini è Yvonne Susini.

Dopu una sizzioni di u battaglionu di "choc" cumandata da l'aghjutanti Lemaire hè ghjunta in Conca in i rinforzu. Sicondi a ciandarmaria di Santa Lucia, quiddu ghjornu l'alimani ani avutu 5 morti è un vintina di firiti.

Quiddu 22 sittembri 1943 trè omini, u spiranti Michelin, Ghjuvan Battisti Leccia è Paulu Cavalloni, sò morti par prutteghja i cunchesi da l'assaltu alimanu chì sarià statu spiatatu. Salutemu u so curaghju è quiddu di i so cumpagni risistenti è di l'omini di u battaglion' di "choc".

In Corsica, i battagli ani cuntinuatu infinu à u 4 uttrovi, a data di a libarazioni di Bastia è di tutta l'isula.

;

;

Ritornu a "A storia di Conca"

Ritornu : Conca in lingua corsa